شجرة الديكور الهوجاء، طريقة زراعة شجر الموالح - البرتقال، الليمون، اليوسفى، الجريب فروت
كنت فاضى و بدور على شجرة حلوة احطها فى البيت تكون سهلة فى التعامل و تكون شكلها جميل اضيفها فى ديكور البيت و مش مكلفة، بعد ما عملت بحث عن حاجة زى كدة لقيت شجر الموالح عشان كل نوع و كل صنف مختلف ليه ورق شكله مختلف عن بعضه وكل ورقة مختلفة فى النوع ليها شكل جميل بيختلف عن بعضه فى الشكل و درجة اللون و سُمك الورق غير ان ملهاش تكلفة خالص ده انت بتعملها من اى برتقالة او اى نوع موالح و ممكن تعملها بونساى (شجرة قزمة) هكتب عنها بعد كدة، قررت اكتب عن البرتقال للناس ... اهو بضيع وقت ... :D
الادوات:
- قصرية
- تربة بييت موس (peat moss)
- سماد بتسيوم
فى طرقتين للزراعة بالحبوب و بالفروع
بالحبوب:
- اول خطوة و اهم خطوة انك تنقى النوع العاوز تزرعه
- هتاخد البذر و تحطه فى صفاية و تنضفه تحت المية كويس، عشان لو فى بواقى من البرتقالة ممكن متخليش الحبوب تنبت
- هتجيب كباية مية و تحط البذر فيها و البذر اليطلع على وش المية يبقى الطاقة الفيه كبيرة و صعب تنبت فشلها ارميها
- الباقى هتنشفه فى منديل و هتجيب سكينة و تقشر الحبوب بدقة من غير ما تيجى نحييت القشرة الجوة
- هتحط الحبوب فى منديل و تقفله و تحطه فى كيس بلاستيك و متربطش الكيس
- حط الكيس فى التلاجة من اربع اسابيع لستة اسابيع عشان لازم الحبوب تعدى على موسم بارد
- بعد ما المدة تخلص هتطلع الكيس و تسيبه من ساعتين لثلاث و وحطها فى كوب مياه ل24 ساعة لتتشبع بالمياه
- بعدين هتزرعها على عمق 1\3 من عمق التربة البيت موس
- هتحافظ على التربة رطبة او طينية و فى الشمس عشان الحرارة و هتاخد تقريبا ما بين 15 يوم لست اسابيع عشان تنبت
- بعد ما تطلع 4-5 ورقات حقيقية هاتروى بعد كل ما تنشف التربة (ممكن فى بيت زرع صغير داخل المنزل)
- بعد ما تطلع و تكبر هتترش بالسماد البتسيوم حسب التعليمات المكتوبة عليه لو محتاجة ، خلى بالك حجم الشجرة بيبقى ضعف حجم القصرية المزروعة فيهم
طريقة الزرع بالفروع هاكتبها بعد كدة بس افضل زرعة هى البتطلع من البذر مش القطع
و ثانكس للقراءة و كان معكم مدحت شلبى يحييكم :D ... ارجو انكم استفدتم
